Desde o seu berce fundacional, Sarabela Teatro e Ollovivo co-producen este Docu-Drama: celebración-indagación vizosa e crítica de enorme interese social e cultural. Desde unha perspectiva contemporánea este proxecto achega, actualiza e espalla unha parte representativa do legado inxente de NÓS. Sumando sinerxías creadoras nunha proposta única. Unindo todo o talento de dous equipos ben coordinados e harmonizados. Apertando xéneros e linguaxes. Son, danza, interpretación, iluminación, música orixinal, proxeccións, documentos visuais… integrados nun mosaico que permite ás persoas que participan mergullarse na alma dunha época.
Buscamos achegar á cidadanía unha parte representativa do legado de NÓS, e facer unha homenaxe á altura das personalidades que formaron parte da Xeración. Trátase de amosar (con alegría e vontade) á mocidade e á cidadanía de onde vimos, tal e como eles fixeron cos seus coetáneos. Para celebrar o amor, a arte e a beleza, a cultura e a ciencia, a memoria e a esperanza.
Sentímonos semente de sangue e de creatividade e cremos que FACER VISIBLE unha herdanza de tal magnitude só é posible coa DIGNIDADE que merece e a ALTA ESTIMA que require